Genesisy
1.
Ny Anaran’ny Boky
Araka
ny efa nolazaiko tery ambony dia avy tamin’ny fandikan’ny LXX ny Gen 2:4a (Βίβλος γενέσεως [biblos genesews]) no nahazoana ny anarana hoe Genesisy. Ny teny Grika hoe γένεσις (genesis)
dia midika hoe “tetiarana” (genéalogie). Io teny Grika io no nahazoana ny teny
Frantsay “Génèse” sy ny Anglisy “Genesis” izay nadika amin’ny teny Malagasy hoe
Genesisy. Ny anaran’ity boky voalohany ao amin’ny Testamenta Taloha ity amin’ny
teny Hebreo dia בְּרֵאשִׁית (berêšît) izay midika hoe “tamin’ny
fiandohana” na “tany am-boalohany.” Ity teny ity rahateo no manomboka ny
bokin’ny Genesisy. Ny fototeny nahazoana io anarana Hebreo io dia רֹאשׁ (rôš) izay midika hoe “loha.” Ny Genesisy
izany dia manambara ny “loha” na “loharano” izay niandohan’ny zavatra rehetra.
2.
Ny Mpanoratra,
Fotoana ary Antony Nanoratana
Antokon’olona
maromaro no nanoratra ny Genesisy fa tsy olona iray. Ny fijery fahizay dia
Mosesy no nanoratra ny Pentateoka manontolo. Taty aoriana anefa dia hitan’ny
mpikaroka fa tsy mitombina izany: ahoana no fomba nanoratan’i Mosesy ny
fahafatesany ao amin’ny Deot 34:5?
Taty
aoriana dia nahita ny mpikaroka fa vondron’olona maromaro no nanoratra ny
Genesisy. Ny voalohany dia ny antoko antsoina hoe P (Priest) izay mpisorona
avokoa. Ny faharoa dia ilay vondrona antsoina hoe J izay azo avy tamin’ny
anarana hoe Jahve na Yahweh. Ny marika ahafantarana ity vondrona ity dia ny
fampiasany matetika ny anarana hoe Yahweh na dia any amin’ny
tantaram-pamoronana aza. Ny vondrona fahatelo nanoratra ny Genesisy dia ny
vondrona antsoina hoe E izay azo avy tamin’ny anaran’Andriamanitra hoe Elohim.
Ireo vondrona mpanoratra telo ireo no nanoratra ny Genesisy.
Ny
fotoana nanoratana ny Genesisy dia nandritra ny fahababoana tany Babylona
tamin’ny taonjato faha-6 BC. Nitondra ratra lehibe teo amin’ny Jiosy ny
fahababoana. Nampametra-panontaniana betsaka azy izany ka isan’izany ny hoe:
naninona izahay no lasa babo? Isan’ny antony nanoratana ny Genesisy io
fanontaniana io ka namaliany fa noho ny tsy fankatoavana ny tenin’YHWH no
nahatonga izany fahababoana izany. Isan’ny antony nanoratana ny Genesisy ihany
koa ny faniriana hampahafantatra ny taranaka aty aoriana ny maha-izy azy ny
Jiosy (indentité). Manoloana ireo anganom-pamoronana be dia be tany Babylona
(efa nanana tranomboky ngezabe ny babyloniana tamin’izany fotoana izany) dia
niezaka koa ireo mpanoratra ireo naneho ny maha izy azy azy tamin’ny alalan’ny
fanehoana ny teolojian’ny famoronana sy ny tantara nipoiran’ny firenena Jiosy
tany amin’ny voalohany. Tsy mahagaga izany raha misy fisainan’ny Proche Orient
fahizay tafiditra ao amin’ny Genesisy satria tany amin’ny fahababoana no
nanoratana azy. Ohatra iray lehibe amin’izany ny kôsmôlôjia hita ao amin’ny
Genesisy izay ahitana ny foto-kevitra tany amin’ny Proche Orient fahizay.
3.
Ny Votoatin’ny Boky
Azo
zaraina telo lehibe ny Bokin’ny Genesisy:[1]
1.
Ny tantaram-pamoronana (primeval
history) (Gen 1–11)
2.
Ny tantaran’ny Patriarka(/Matriarka)
Abrahama, Isaka ary Jakoba (Gen 12–36)[2]
3. Ny tantaran’i Josefa (Gen 37–50)
Misy koa mpikaroka mizara ny Genesisy ho efatra
lehibe:[3]
1. Ny tantaram-pamoronana (Gen 1–11)
2. Ny tantaran’i Abarahama (11:27–25:18)
3.
Ny tantaran’i Jakoba (the Jacob
cycle) (25:19–36:43)
4. Ny
tantaran’i Josefa (37:1–50:26)
Ity fizarana farany dia ahitana mazava kokoa ny
fiavahan’ny tantaran’i Abrahama ao anatin’ny tantaran’ny Patriarka. Mendrika ny
hiavaka tokoa ny tantarany satria izy amin’ny maha lohan’ny Patriarka azy dia
manana ny toerany manokana ao amin’ny Genesisy. Izy no genesisin’ny firenena voafidy.
Araka ny efa nolazaiko etsy ambony dia zava-dehibe ao
amin’ny Genesisy ny hevitra fonosin’ny teny Hebreo hoe תוֹלְדוֹת(tôledôth)
izay manana hevitra maro: fiandohana, taranaka, tetiarana, tantara sns. Ity
teny ity rahateo moa no nadikan’ny Septanta (LXX) hoe γένεσις (genesis) izay
nahazoana ny anaran’ny boky. Noho izany dia io teny io no manomboka ireo
fizarana lehibe ao amin’ny boky araka ny ahitantsika azy etsy ambany:[4]
I. Famoronana (1:1–2:3)
II. Talohan’ny Patriarka
1.
Tôledôth n’ny Lanitra sy ny Tany (2:4–4:26)
2.
Tôledôth n’i Adama (5:1–6:8)
3.
Tôledôth n’i Noa (6:9–9:29)
4.
Tôledôth n’i Sema, Hama, ary Jafeta (10:1–11:9)
5.
Tôledôth n’i Sema (11:10–26)
III. Ireo Patriarka tany Palestina: Fanorenana
ny Vahoakan’ny Fanekena
1.
Tôledôth n’i Tera (11:27–25:11)
2.
Tôledôth n’i Ismaela (25:12–18)
3.
Tôledôth n’i Isaka (25:19–35:29)
4.
Tôledôth n’i Esao (36:1–8)
5.
Tôledôth n’i Esao (36:9–37:1)
IV. Ireo Patriarka tany Egypta
1. Tôledôth n’i Jakoba (37:2–50:26)
Araka
io firafitra io dia mizara iraikambinifolo ny boky Genesisy ka ny teny Hebreo
hoe אֵלֶּה תֹּלְדוֹת(’êleh tôledôth) izay midika hoe
“ity ny tantaran’ny” na “toy izao no tantaran’i” no manomboka ireo fizarana
ireo. Antsoin’ny mpikaroka hoe “toledoth
formula” ity fomba fanoratra ity. Amin’ny ankapobeny dia azo adika hoe
“tantaram-pirazanana” na “tantara” ny teny hoe תוֹלְדוֹת (tôledôth) ary raha amin’ireo
tantaran’olombeblona dia marina tokoa io fandikana io. Tsy marina anefa izany
raha ny lanitra sy ny tany no resahina (2:4–4:26). Hita miharihary
izany fa “formule” manokana nampiasain’ny mpanoratra ny Genesisy ity fomba
fiteny ity nanombohany ireo fizarana tsirairay ao amin’ny boky. Ndao ary
hojerentsika etsy ambany ny votoatin’ireo fizarana telo lehibe voalaza tery
ambony.
Ny
Tantaram-pamoronana (Primeval History): Gen 1–11
Ity
fizarana voalohany ity dia mahakasika ny famoronana izao tontolo izao (Gen
1:1–2:4a) arahin’ny tantara mikasika ny olombelona voalohany: ny tantaran’i
Adama sy Eva tao amin’ny saha Edena sy ny nandroahan’Andriamanitra azy ireo avy
tao (Gen 2–3), ny namonoan’i Kaina an’i Abela rahalahiny (Gen 4), ny
tantaram-pirazanana manomboka amin’i Adama ka hatramin’i Noa (Gen 5), ny
tantaran’ny safo-drano (Gen 6:1–9:17) arahin’ny fahamamoan’i Noa sy ny
tantaran’ireo zananilahy telo dia Sema, Hama ary Jafeta (Gen 9:18–10:32). Ity
tantaram-pamoronana ity dia miafara amin’ny tantaran’ny Tilikambo tao Babela,
ny fifangaroan’ny fiteny, ny fiparitahan’ny olombelona manerana ny tany ary ny
tantaram-pirazanana avy amin’i Sema mandrapahatonga amin’i Tera, rain’i
Abra(ha)ma (Gen 11).
Ny
tantaran’i Abrahama, rain’ny mino dia manomboka amin’ny fiantsoana azy avy tany
Teolojia fa tsy Tantara ny
Genesisy
Maro ireo mamaky ny bokin’ny Genesisy no very hevitra
sy tafalatsaka amin’ny fijery fa diso ny Baiboly. Ny mahatonga izany dia satria
heverin’ny maro fa boky mitantara ny
famoronana amin’ny antsipirihany toy ny boky siansa moderna ny Genesisy. Tsy
boky tantara ny Genesisy fa boky mirakitra ireo teboka teolojika lehibe teo
amin’ny famoronana sy ny fiforonan’ny firenen’Israely. Raha ny solomason’ny
siansa moderna no amakiantsika ny Genesisy dia hahita zavatra maro tsy
mifanaraka amin’izany tokoa isika: tsy boribory ny tany ao amin’ny Gensisy fa
fisaka ka hazonin’ny andry lehibe avy ao ambanin’ny tany, tsy planeta hafa ireo
kintana fa fahazavana izay miraikitra eo amin’ny lanitra, ny habakabaka dia tsy
“vapeurs” fa takelaka “solide” izay mihazona ireo rano ao amboniny tsy hiraraka
sady mihazona ny fitoeran’Andriamanitra ao ambony… Tadidio fa Jiosy
niaina tany amin’ny taonjato faha-6 BC no nanoratra ny Genesisy. Ireo Jiosy nanoratra
sy namaky ny Genesisy dia tsy nahafantatra ny siansa moderna fa nanoratra
tamin’ny alalan’ny fahalalany. Izay nosoratany dia marina tamin’ny siansan’ny
taonjato niainany na dia toa diso amin’ny siansantsika ankehitriny aza.
Tsy
voatery hazava na nasehon’ny mpanoratra amin’ny antsipirihany ny tantaran’ireo
olombelona nohariana voalohany. Izany no mahatonga antsika tsy hahazo iza
marina no vadian’ireo mirahalahy zanak’i Adama sy Eva, Kaina sy Abela. Ny
zava-dehibe tamin’ny mpanoratra dia ny hahazoan’ny mpamaky ny teolojia lehibe
ao amin’ny famoronana: Andriamanitra no Mpamorona ny zavatra rehetra dia ny lanitra,
tany ary ny olombelona.
2.2.1.4. Ny
Teolojia Fonosin’ny Boky
Famoronana
Ny boky Genesisy dia manomboka amin’ny tantara roa
mikasika ny famoronana dia ny Gen 1:1–2:4a izay nosoratan’ireo mpisorona (P) sy
ny Gen 2:4b–2:25 izay asa soratry ny Yahwiste (J). Araka ny P ny Andriamanitra
mpamorona dia miasa ivelan’ny tontolo voahary (transcendent creator). Ity
fijerin’ny P ity dia manohitra ireo anganom-pamoronana tany amin’ny Proche
Orient fahizay izay nilaza ny famoronana ho vokatry ny ady nifanaovan’ireo
andriamanitra toy izay hita ao amin’ny Enuma Elish sy ny tantaram-pamoronana
babyloniana (Babylonian Creation Epic).[5] Hita taratra ihany io resaka ady kosmika io amin’ny
toerana hafa ao amin’ny Baiboly saingy eto amin’ny Genesisy kosa dia tsy misy
ady ataon’Andriamanitra mihitsy mandritra ny famoronana, i.e., tsy manana
mpanohitra Izy teo amin’ny asam-pamoronana nataony. Hita taratra
amin’ity tantaram-pamoronana natao’ny P ity ny fisainana tany amin’ny Proche
Orient fahizay momba ny famoronana. Tsy toy ireo fijery Jiosy sy Kristiana taty
aoriana izay nametraka ny famoronana ho avy amin’ny tsy misy ny P. Amin’ny P
dia tsy namorona ny rano sy ny tany maina Andriamanitra fa ny nataony dia
nandamina ireo singa tsirairay ireo. Eo amin’ny Gen 1:1 dia namorona (ברא bara’) ny lanitra sy ny
tany Andriamanitra (Elohim). Marihina
fa tsy fantatry ny Proche Orient fahizay ny hevitra momba ny famoronana avy
amin’ny tsy misy (creatio ex nihilo)
fa fisainana moderna ankehitriny izany. I Augustin no voalohany nampiasa io
fomba fiteny io nilazana ny famoronana ao amin’ny Genesisy. Ny
fiverimberenan’ny matoanteny roa בדל (bdl, “mizara, mampisaraka” Gen 1:4, 6,
7, 14, 18) sy קרא (qr’, “miantso, manome anarana” Gen 1:5,
8, 10, 2:19, 20, 23sns) ao amin’ny tantaram-pamoronana dia manambara fa manana
toerana lehibe teo amin’ny famoronana ny fandaminana sy fanomezana anarana ary
anjara asa. Raha ny famoronana no lazaina, teo amin’ny Proche Orient fahizay
dia antsoina hoe “voaary” ny zavatra iray rehefa nomena anarana sy anjara asa
(nom et fonction). Eo amin’ny Gen 1:2 dia voalaza fa תֹהוּ וָבֹהוּ (tôhû wāvôhû) ny tany (הָאָרֶץ) voary voalohany. Ny hoe tôhû
wāvôhû dia ilazana ny tany mbola nikorontana sy tsy nisy endrika ka tsy
mbola azo nampiasaina. Manomboka eo amin’ny and. 3 dia namorona ny fahazavana
Andriamanitra ary eo amin’ny and. 4 dia nosarahiny ny fahazavana sy ny aizina
ary nomeny anarana ireo singa vaovao ka ny fahazavana nantsoiny hoe andro ary
ny aizina nantsoiny hoe alina. Toy izany hatrany ny fizoran’ny famoronana.
Andriamanitra dia manasaraka avy eo manome anarana ary avy eo manome ny anjara
asany eo amin’ny voahary.
Ao
amin’ny Enuma Elish (boky mirakitra ny
anganom-pamoronana babyloniana) ny olombelona dia nohariana avy tamin’ny
ràn’ilay andriamanitra mpikomy antsoina hoe Kingu mba hanamaivanana ny asa
fanompoana ataon’ireo andriamanitra ambany kokoa. Ao amin’ny Gen 1 anefa ny
olombelona lahy sy vavy dia nohariana tamin’ny endrik’Andriamanitra ary nataony
hanjaka amin’ny zavaboahary rehetra. Ny matoanteny hoe ברא (bara’) no ampiasain’ny mpanoratra
ilazana ny famoronana ny olombelona voalohany (Gen 1:27). Lahy sy vavy (זָכָר וּנְקֵבָה, zākhar ûneqēvā)
no noforoniny. Mazava tsara fa olombelona roa manana “sexes” roa samy hafa lahy
sy vavy no nohariany fa tsy olona iray manana “sexes” roa na ilay antsoina hoe
“androgyne.” Amin’ity famoronana ny olombelona araka ny P ity dia ankapobeny
kokoa ny anolorana azy.
Miavaka
kosa ny tantaram-pamoronana araka ny J satria mampiasa voambolana fampiasa ety
an-tany sy ny antsoina hoe “anthropomorphisme.” Ny “anthropomorphisme” dia ny
fomba filazana an’Andriamanitra ho manao ny fanaon’ny olombelona toy ny
mandehandeha, manenina, tezitra sns. Antsipirihany kokoa ny famoronana ny
olombelona araka an’i J. Naka vovotany (עָפָר, ʽāphār) Andriamanitra (Elohim) ka novolavolainy (יצר, yṣr) tamin’ny tànana toy ny fanaon’ny mpanao sary vongana
ary avy eo nofofoniny (נפח, nphḥ) fofonaina mahavelona (נִשְׁמַת חַיִּים , nišemath ḥayyîm) teo amin’ny
vavorony (אַף, ’aph)
ka tonga olona na aina velona (נֶפֶשׁ חַיָּה, nepheš ḥayyā) izy.
Ny
famoronana ny vehivavy voalohany dia vokatry ny tsy nahitan’ Andriamanitra
mpanampy tandrify ho an’i Adama tamin’ireo biby voahary rehefa hitany fa tsy
tsara raha irery izy (Gen 2:18–20). Tamin’izany no nakan’Andriamanitra singa
tao amin’i Adama dia ny taolan-tehezany (צֵלָע, ṣēlāʽ)
ka namoronany ny vehivavy voalohany. Teto ihany koa no niforonan’ny filàna teo
amin’ny lahy sy vavy voalohany. Mazava tsara fa teo amin’ny “sexes” roa samy
hafa lahy sy vavy no nipoiran’ny firaisana ara-nofo voalohany. Manohitra ny
resaka fiarahan’ny mitovy fananahana (homosexualité) izany. Lavin’ny Genesisy
tanteraka ny “homosexualité” sy ny fanambadiana maro (polygamie).
Fahalovana / Fahalavoana
Isan’ny
teboka teolojika manana ny maha izy azy ao amin’ny Genesisy ny fahalovana
vokatry fahalavoana. Maro ireo teolojiana ankehitriny no mandà ny teolojian’ny
“fahotana lovàna” (péché originel na original sin) izay milaza fa vokatry ny
nidiran’ny fahotana tao amin’i Adama, ilay olombelona voalohany, dia mandova
izany fahotana izany koa ny olombelona rehetra. Na dia tsy voalaza miharihary
aza izany hevitra izany ao amin’ny Gen 3 dia hita taratra kosa ny fivoizana
izany teolojia izany taty aoriana ao amin’ny Testamenta Vaovao ao amin’ny
teolojian’i Paoly. Tamin’ny alalan’ny fitaky ny menarana no nidiran’ny fahotana
tao amin’ny olombelona voalohany. Tsy ambaran’ny Genesisy ny fiavian’ny ratsy,
fa ao amin’ny Gen 3 kosa dia efa tao amin’ny menarana ny ratsy ka tafiditra tao
amin’ny olombelona. Ny fidiran’ny fahotana tao amin’ny olombelona dia nahatonga
an’Andriamanitra handroaka azy ireo avy tao amin’ny saha Edena mba tsy
hahatonga azy ireo hihinana avy amin’ny hazonaina ka ho velona mandrakizay (3:22–24).
Tsara
ho fantatra ihany koa fa araka ny teolojian’ny J dia nahorina hanana ny endriky
ny Tempoly voalohany ny saha Edena. Ny firafitry ny saha Edena indrindra ny
fametrahana ireo kerobima teo atsinanan’ny saha dia manambara fa sarin’ny fidirana
tao amin’ny Tempoly ity nambenan’ny kerobima ity. Marihina mantsy fa mitodika
miankandrefana ny Tempoly ary any atsinanana no fivoahana. Araka io sary
ataon’ny J io dia voaroaka niala tao amin’ny Tempoly voalohany ireto olombelona
voalohany. Ity hevitra ity ihany koa dia ahitantsika taratra ny antony
nanoratana ny Genesisy. Isan’ny fanontaniana lehibe izay valian’ny Genesisy ny
hoe: “nahoana no lasa babo Joda?” Ny valin’io fanontaniana io dia ao amin’ny
Gen 3: toy ny nandroahana an’i Adama sy Eva hivoaka tao amin’ny Tempoly
voalohany tao Edena no nandroahan’i YHWH ny vahoakany hiala tao amin’ny taniny
izay nisy ny Tempoly tao Jerosalema.
Fanekena
Anakiray
amin’ireo teolojia manan-danja ao amin’ny Genesisy ny fanekena. Ireo fanekena
roa lehibe ao amin’ny Testamenta taloha dia samy hita Genesisy avokoa. Ny
voalohany dia ny fanekena tamin’i Noa. Voalaza fa nanenina (נחם, nḥm) i YHWH tamin’ny
nanaovany ny olombelona satria tena feno faharatsiana (רָעָה, rāʽāh) ny fiainany
manontolo (Gen 6:5, 6). Ity antony ity no nahatonga an’i YHWH handringana ny
olombelona rehetra teto ambonin’ny tany. Na izany aza anefa dia Noa irery ihany
no nahita fitia (מָצָא חֵן, māṣā’ ḥēn Gen 6:8) teo
imason’i YHWH ka izy valo mianaka ihany no ho afaka amin’ny fandringanana. Nodiovin’Andriamanitra
tamin’ny nalalan’ny safodrano izao tontolo izao ary taorian’izany dia nanao
fanekena tamin’i Noa YHWH fa tsy handringana izao tontolo izao amin’ny
alalan’ny rano intsony: “Dia aoriko ny
fanekeko aminareo, ka tsy haringako amin’ny safo-drano intsony ny nofo rehetra,
ary tsy hisy safo-drano hanimba ny tany intsony” (Gen 9:11). Ny teny Hebreo
hoe בְּרִית(berîth)
“fanekena” dia ilazana fifamatoram-panekena ataon’ny olona roa na Andriamanitra
sy ny olona. Raha Andriamanitra no “sujet” manao ny fanekena dia fanekena no
ilazana azy, i.e., Andriamanitra no ivoahan’ny hevitra ary Izy ihany no
manapa-kevitra hanao ilay fanekena fa tsy misy hevitra avy amin’ny olona. Teo
amin’ny fanekena tamin’ny Noa dia Izy no nanapa-kevitra tsy handringana ny
olombelona sy ny tany intsony. Toy izany koa ny fanekena tamin’i Abrahama.
Niantso an’i Abrama YHWH ary avy eo dia nanao fanekena taminy. Ny votoatin’ny
fanekena nataony dia ny hanome azy taranaka maro hameno ny tany, sy tany
onenana ary fitahiana: “Ary haoriko ny
fanekeko ho amiko sy ho aminao mbamin’ny taranakao mandimby anao hatramin’ny
taranaka fara mandimby, ho fanekena mandrakizay, mba ho Andriamanitrao sy ny
taranakao mandimby anao Aho” (Gen.
17:7). Nataon’Andriamanitra ho fantsona hitondra fitahiana eto amin’izao
tontolo izao Abrahama sy ny taranany: “dia
hahatonga anao ho firenena lehibe Aho sady hitahy anao sy hahalehibe ny anaranao;
ary ho fitahiana tokoa ianao (Gen. 12:2). Ny
teny Hebreo hoe בְּרָכָה(berākhā)
“fitahiana” lazaina eto dia mahakasika ny lafim-piainana manotnolo fa tsy ny
ara-panahy ihany.
Fifidianana
Teolojia
iray lehibe manana ny toerany ao amin’ny Genesisy ny fifidianana (election). Eo
amin’ny tantaran’i Abrahama no tena ahitantsika izany mazava tsara.
Fanapahankevitr’Andriamanitra irery ihany izany ary tsy miankina amin’izay mety
ho fahatsarana na fahamendrehan’izay voafidy. Nifidy an’i Abarama izay
jentilisa sy tao amin’ny firenena mpanompo sampy YHWH mba hanorenany ny
firenen’Israely. Ny taranak’i Abarahama dia i Jakoba no nitolona
tamin’Andriamanitra ka tamin’izany no nanomezana ny anarana hoe Israely: “Ary hoy indray Izy: Tsy hatao hoe Jakoba
intsony ny anaranao, fa Israely; satria efa nitolona tamin’Andriamanitra sy
tamin’ny olona hianao ka nahery” (Gen. 32:29). Ny teny Hebreo hoe יִשְׂרָאֵל(yiśrāēl) dia midika
hoe “mitolona amin’ Andrialmanitra.” Io anarana vaovao nentin’i Jakoba io no
lasa anaran’ny firenena Israely mandraka ankehitriny ary tao no nofidin’Andriamanitra
koa nivoahan’ny Mesia (Jesosy Kristy) izay Mpamonjy izao tontolo izao. Mbola
mitohy mandrake ankehitriny ny fifidianan’Andriamanitra ny tsirairay ho
amin’izany famonjena izany amin’ny alalan’ny finoana an’i Jesosy Kristy.
Ny azo Iainana ny Genesisy Ankehitriny
· Azo
antoka fa Andriamanitra no namorona izao tontolo izao na dia eo aza ireo siansa
izay mandiso izany
· Tena
simba ny olombelona noho ny fahotana, feno ny lafim-piainan’ny olona rehetra ny
fahalovana. Mila ny famonjen’i Jesosy Kristy ny olombelona rehetra.
· Zava-masina
sy ambony amin’Andriamanitra ny fanambadiana, tsy mendrika hitsahina sy
holotoina ny fahamasinan’ny fanambadiana: Izy no nanorina sy nanamasina (=nanokana)
ary nitahy ny fanambadiana
· Mankahala
ota Andriamanitra, maharikoriko azy ny fahotana
· Fitiavana
Andriamanitra, na dia lavo aza ny olombelona noho ny fapahankeviny dia efa
nanomana Mpamonjy ho an’ny olombelona rehetra Andriamanitra tamin’ny alalan’ny
Abrahama
· Mbola
mifidy mpanota hampiasainy ho fitahiana ho an’ny hafa tahaka an’i Abrahama Andriamanitra
[1] Vriezen, Woude, Ancient Israelite
and Early Jewish Literature, 183.
[2] Matetika dia ny Patriarka
foana no hita ao amin’ireo fitarihanteny maro momba ny Genesisy. Raha ny marina
anefa dia tsy misaraka mihitsy ny Patriarka sy ireo reny na Matriarka izay
loharano nipoiran’ny taranak’i Abrahama.
[3] Jon D. Levenson, “Genesis,” in The
Jewish Study Bible (ed. Adele Berlin and Marc Zvi Brettler; Oxford: Oxford
University Press, 2004), 9.
[4] Andrew E. Hill, John H. Walton, A
Survey of the Old Testament, Vol. (Grand Rapids: Zondervan Publishing
House, 2010), Epub Edition, Chapter 4 Genesis: Outline.
[5] Joel S. Kaminsky, “The Theology of Genesis,” in The Book of Genesis: Composition, Reception, and Interpretation (ed. Craig A. Evans, Joel N. Lohr, et al.; Leiden: Brill, 2012), 636.
0 Comments